പൊതുമേഖലാ ശമ്പള പരിഷ്കരണ ചർച്ചകൾ ഇന്ന് ഡബ്ല്യു.ആർ.സിയിൽ ആരംഭിക്കും

അയർലണ്ടിലെ പൊതുമേഖലാ ജീവനക്കാരുടെ പുതിയ ശമ്പളക്കരാറുമായി ബന്ധപ്പെട്ട ഔദ്യോഗിക ചർച്ചകൾ ഇന്ന് വർക്ക്പ്ലേസ് റിലേഷൻസ് കമ്മീഷനിൽ (WRC) ആരംഭിക്കും. കഴിഞ്ഞ ബുധനാഴ്ച മൂന്ന് ലക്ഷത്തിലധികം പൊതുമേഖലാ ജീവനക്കാർ പങ്കെടുത്ത പണിമുടക്കിനെ തുടർന്ന്, ശമ്പള തർക്കം പരിഹരിക്കാൻ സർക്കാർ നിയോഗിച്ച സമിതിയുടെ നേതൃത്വത്തിൽ ശനിയാഴ്ച നടന്ന ചർച്ചകൾക്ക് ശേഷമാണ് ഈ തീരുമാനം.

വരാനിരിക്കുന്ന ബുധനാഴ്ച നടത്താനിരുന്ന രണ്ടാമത്തെ പണിമുടക്ക് ചർച്ചകൾക്ക് അവസരമൊരുക്കുന്നതിനായി യൂണിയനുകൾ താൽക്കാലികമായി മാറ്റിവെച്ചിട്ടുണ്ട്. എങ്കിലും, പൊതുമേഖലയിൽ നിലവിലുള്ള 'വർക്ക് ടു റൂൾ' സമരം തുടരുകയാണ്. ഡബ്ല്യു.ആർ.സി ചെയർമാൻ കെവിൻ ഫോളിയുടെ നേതൃത്വത്തിൽ ഇരുവിഭാഗങ്ങളുടെയും പ്രതിനിധികൾ അടങ്ങുന്ന സംഘമാണ് ഇന്ന് ഔദ്യോഗിക ചർച്ചകൾ ആരംഭിക്കാൻ നിർദേശം നൽകിയത്.

ശമ്പളവുമായി ബന്ധപ്പെട്ട വിഷയങ്ങളിൽ നിന്നാണ് ചർച്ചകൾ ആരംഭിക്കേണ്ടതെന്ന് സമിതി സംയുക്ത പ്രസ്താവനയിലൂടെ വ്യക്തമാക്കി. 2021 മുതൽ 2025 വരെയുള്ള കാലയളവിലെ ജീവിതച്ചെലവ് വർധനവിനെക്കുറിച്ചുള്ള യൂണിയനുകളുടെ ആവശ്യങ്ങൾ, നടപ്പുവർഷത്തെ കാര്യങ്ങൾ, പുതിയ കരാറിന്റെ കാലാവധി എന്നിവ പരിഗണിക്കും. മുൻ കരാറിന്റെ പശ്ചാത്തലത്തിൽ നൽകിയ വാഗ്ദാനങ്ങൾ പാലിച്ചുകൊണ്ട് പൊതുമേഖലയിലെ തൊഴിൽബന്ധങ്ങളിൽ ആത്മവിശ്വാസം പുനഃസ്ഥാപിക്കേണ്ടതുണ്ടെന്നും സമിതി ചൂണ്ടിക്കാട്ടി. ചർച്ചകളിൽ ഏതെങ്കിലും തരത്തിൽ വഴിമുട്ടൽ ഉണ്ടായാൽ ഇടപെടാൻ സ്വതന്ത്ര സമിതി ലഭ്യമായിരിക്കുമെന്നും, അവർ മുന്നോട്ടുവെക്കുന്ന പരിഹാരമാർഗം ഇരുപക്ഷവും അംഗീകരിക്കണമെന്നും വ്യക്തമാക്കിയിട്ടുണ്ട്.

പുതിയ ശമ്പളക്കരാർ പൊതുസേവന മേഖലയിൽ കാര്യക്ഷമതയും ഉൽപ്പാദനക്ഷമതയും വർധിപ്പിക്കുന്നതിനൊപ്പം കുറഞ്ഞ ശമ്പളമുള്ള ജീവനക്കാർക്ക് സംരക്ഷണം നൽകുന്നതുമായിരിക്കണമെന്ന് പ്രധാനമന്ത്രി (തീയോശെക്) മീഹോൾ മാർട്ടിൻ ഇന്നലെ പറഞ്ഞു. ഏതൊരു കരാറും നൽകുന്ന പണത്തിന് തക്കതായ മൂല്യം ഉറപ്പാക്കുന്നതായിരിക്കണം എന്നും അദ്ദേഹം കൂട്ടിച്ചേർത്തു.

ശമ്പളക്കരാറിനായി ബജറ്റിൽ വകയിരുത്തിയ 120 കോടി യൂറോയ്ക്ക് പുറമേ, വകയിരുത്താത്ത 160 കോടി യൂറോയുടെ ഫണ്ടിൽ നിന്ന് സർക്കാർ തുക ചെലവഴിക്കുമോ എന്ന ചോദ്യത്തിന് വ്യക്തമായ ഉത്തരം നൽകാൻ അദ്ദേഹം തയ്യാറായില്ല. എന്നാൽ പുതിയ കരാറിന്റെ ചെലവ് 200 കോടി യൂറോ വരെ ഉയർന്നേക്കാമെന്നാണ് യൂണിയനുകൾ സൂചിപ്പിക്കുന്നത്. ബജറ്റിൽ പ്രഖ്യാപിച്ച തുകയല്ലാതെ നിലവിൽ കൃത്യമായ കണക്കുകളോ തുകയോ തീരുമാനിച്ചിട്ടില്ലെന്ന് പ്രധാനമന്ത്രി വ്യക്തമാക്കി.